Bhit Shah

حضرت سيد شاهه عبداللطيف ڀٽائي رحمته الله عليه جن جو دنبورو

                                                 تن تسبيح من مڻيو دل دنبورو جَن
                                                 تندون جي طلب جون، وحدت سُر وڄن
                                                 وحده لاشريڪ له، ِاهو راڳ رڳُن
                                                 سي سُتا ئي سُونهن، ننڊ عبادت اُن جي
                                                                                        (شاهه سائين رحمته الله عليه)
حضرت سيد شاهه عبداللطيف ڀٽائي رحمته الله عليه جن جو رسالو ، طريقت ، راڳ دنيا جو نرالو ۽ روحانيت ڀريل آهي. حضرت سيد شاهه عبداللطيف ڀٽائي رحمته الله عليه جن جي بيتن کي پڙهڻ سان سماع جي احديت جي ذڪر ڪرڻ سان انسان کي قلبي (روحاني) سڪون ملي ٿو، اهڙي ريت حضرت سيد شاهه عبداللطيف ڀٽائي رحمته الله عليه جو راڳ ٻڌڻ سان قلب روحانيت سان ڀرجي وڃي ٿو. اندر جا غم ۽ وهم انسان وساري الله سان تعلق مضبوط بڻائي ٿو.

حضرت سيد شاهه عبداللطيف ڀٽائي رحمته الله عليه جن جي راڳ جو تعلق سنڌي ٻولي سان آهي ، پر موسيقي جي زبان بين الاقوامي ٻولين ۾ شمار ڪئي وڃي ٿي. حضرت سيد شاهه عبداللطيف ڀٽائي رحمته الله عليه جن جو دنبورو توحيد جي پنجن تندن سان سلهاڙيل آهي، هر تند مان نڪرندڙ ” تُون تُون “ جو آواز الله جي توحيد بيان ڪري ٿو. ٻڌڻ واري کي نه رڳو هي آواز ڪنن تائين پهچي ٿو پر هن توحيدي تند جي پهچ دل ۽ روح تائين ٿئي ٿي. ٻڌندڙ ۽ وڄائيندڙ کي ڪيفيت طاري ٿي وڃي ٿي. پنهنجو هئڻ وڃائي ويهن ٿا.

حضرت سيد شاهه عبداللطيف ڀٽائي رحمته الله عليه جي دنبوري جو تعلق روح ۽ دل سان آهي ، جهڙي ريت ذڪر ڪيو وڃي ٿو . انهي رمز سان هي راڳ پڻ ڳايو وڃي ٿو. تقريبن ٽي سئو سالن کان هلندڙ حضرت سيد شاهه عبداللطيف ڀٽائي رحمته الله عليه جو راڳ بنا ڪنهن وقفي جي هلي رهيو آهي. ٽي صديون گذرڻ جي باوجود راڳ بند نه ٿيو آهي. وقت گذرڻ سان گڏوگڏ حضرت سيد شاهه عبداللطيف ڀٽائي رحمته الله عليه جو راڳ ٻڌندڙن ۾ ڏينهن و ڏينهن اضافو ٿي رهيو آهي. اهڙي ريت راڳ آلاپيندڙن جو دائرو پڻ وڌي رهيو آهي. حضرت سيد شاهه عبداللطيف ڀٽائي رحمته الله عليه جي راڳ ۽ دنبوري جو تعلق الله پاڪ جي توحيد سان آهي. دنبوري جي تندن جو آواز الله جي توحيد جي ”تُون تُون“ ڪري نشاندهي ڪري ٿو. حضرت سيد شاهه عبداللطيف ڀٽائي رحمته الله عليه جو راڳ به ٻي موسيقي جيان طريقيڪار سان آلاپيو وڃي ٿو. حضرت سيد شاهه عبداللطيف ڀٽائي رحمته الله عليه جي دنبوري ۽ راڳ جو تعلق دنياوي نفساني موسيقي سان هرگز نه آهي.ان جو اندازو ان مان لڳائي سگهجي ٿو ته ، محرم الحرام جي نائين ۽ ڏهين تاريخ تي به شاهه سائين جي درگاهه تي دنبوري جي تنوار سان توحيدي راڳ آلاپيو وڃي ٿو. حضرت سيد شاهه عبداللطيف ڀٽائي رحمته الله عليه هي دنبورو ڪاريگر ”موتي“ ۽ ”گوپال“ کان جوڙايو. حضرت سيد شاهه عبداللطيف ڀٽائي رحمته الله عليه جي دنبوري ۾ تُون تُون جي تنوار انسان جو تعلق مالڪِ حقيقي (الله تعالى) سان جوڙي ٿي.